Powered By Blogger

Selasa, Agustus 17, 2010

pantun patitiah

Pai baguru ka Sungai buluah
Baraja manitah jo datuak sati
Jan sampai lupo sumbayang subuah
Jago pagi mancari rasaki
.......
Latakkan galeh di ateh baki
Baki di aleh jo kain sirah
Sumbayang Zuhur di siang ari
Sabalun maisi parak tangah
.......
Bukik apik jo pintu kabun
Duo nagari nan badakek-an
Sumbayang asa matoari turun
Jo tumakninah kito tagak-kan.......
Gadang aianyo batang antokan
Mamapeh ikan duo jo tigo
Sumbayang mugarik kito tagakkan
Bajamaah basamo-samo
.......
Kok ka ulaan pai basapa
Banyak dilakukan urang tarikat
Di malam ari sumbayang isa
Supayo salamaik dunia akhirat
........
Lamak bikanyo si mariana
Batambah lamak dimakan basamo
Tagakkan juo sumbayang dhuha
Di pagi ari sabalun karajo
.......
Tajun payuang pakai parasut
Pandai-pandai mancaliak medan
Jikok baniaik sumbayang tahajut
Di tangah malam di tagakkan........
Sabtang kayu nan rimbun
Kok ditabang ado gunonyo
Nyampang iduik saribu tahun
Indak sumbayang apo gunonyo..
Asam kandih asam galugue
Asanyo asam dari silayang
Manangih maik dalam kubue
Takana badan indak sumbayang..
Elok elok manabang pimpiang
Jan tatabang pimpiang mudo
Elok elok sanak manatiang
Jan sampai tacampak sambalado.....
Nan kuriak iyo lah kendi
Kok nan merah tantu sago
Kabae sanak nan elok budi
Kok bakato jo indah baso......
Nan kabalai mangko kasalasa
Mambaok cetak nan jo palakaik
Mohon mananti sanak sabanta
Ambo mancari kato mupakaik.....
Anai anai tabang karimbo
Tibo dirimbo mamakan padi
Cukuik sakian dari ambo
Kato bajawek salam kumbali.....
Sairiang balam jo barabah
Barabah tibo balam mandi
Sairiang salam jo sambah
Ambo barangkek kajawa lai.....
WASSALAMUALAIKUM WR WB

Tidak ada komentar:

Posting Komentar

Berkomentar lah dengan sopan...