Kamis, Agustus 11, 2011

SILAUIK

Dima bana kampuang Silauik
Lataknyo ditapi jalan gadang
Kalau hati alah tapauik
Lautan sati kito hadang
Daerah transmigrasi di Silauik
Bajarak saketek dari kampuang asli
Lokasinya lah dakek ka tapi lauik
Ombak maimbau dimalam hari
Kampuang Silauik jo kampuang Lunang
Jaraknyo sekitar anam kilo
Kok taragak makan jo ikan panggang
Disiko bana tuan lapeh salero
Silauik jo kampuang Lunang
Samo-samo daerah transmigrasi
Disiko mangecek jo duo bahaso
Alah bacampua tempe jo randang
Bagalinco gudeg jo kalio ati
Mancapak makan Malin Mancayo, hehe...
Kok bajalan disiko dimalam hari
Usah tuan bimbang jo ragu
Turuik i sajo pituah rang tuo-tuo
Kok ado tadanga langkah mairiangi
Itulah langkah inyiak panunggu
Kakawan tuan supayo jalan baduo
Jo inyiak balang usahlah takuik
Karano inyo bukan nak manangkok
Sakadar mairiang dari bulakang
Cuma dek awak raso ka kalua isi paruik
Lah balapuih-lapuih rasonyo angok
Darah pangguruah malenggang-lenggang
Dituruti sajo pasan nan tuo-tuo
Insya Allah badan salamaik
Bajalan malam pasal biaso
Urang didunia banyak kiramaik
Kalau tuan nak ka Bengkulu
Lubuak Pinang pintu gerbangnyo
Mereka mangecek jo caro awak
Samantaro Ranah bundo tacinto pamit daulu
Kito sambuang pulo jo serial nan katibo
Untuang-untuang lapeh rindu jo taragak

1 komentar:

Berkomentar lah dengan sopan...