Kk

Pituah lamo nan ndak lakang dek paneh, ndak lapuak dek hujan, tapakai di maso kini jo mandatang.

- MINANG BAGUNCANG -
Lah hiruak urang di Minang
Apo lai di rantau urang
Bak cando rumah tapanggang
Pakiak jo sorak sabana lantang

Bak labah ta hoyak sarang
Cando karo kanai jilatang
Sarupo baruak kanai miang
Bantuak kabau kanai jumalang

Ibarat, umpamo rumah gadang
Sabagai symbol  jo lambang
Tunggak tuonyo  nan baguncang
Sandinyo  bana nan ka urang goyang

Tapian mandi nan nyo ampang
Nak manuka cupak jo gantang
Nak ma urak tanggo jo janjang
Jalan nan luruih nyo buek simpang

Agamo ka nyo timbang-timbang
Islam nan ka nyo bidang-bidang
Adat jo syara' ka nyo palang
luruihnyo buek mambulintang

Nyampang disigi jo di siang
Ibarat urang dalam parang
Di caliak musuah nan datang
Patuik kito maraso gamang

Iko karajo bukan sumbarang
Kok indak bapikie matang matang
Tantu ka jadi bumerang
Babaliak awah bak manabang

Kalau bukan pasiek jo dalang
Atau saketek ba aka kurang
Tantu pasti ado dalang
Man sponsori di balakang

Jikok disimak di pandang pandang
Baliauko bukan urang pandatang
Bukan bulando bukan  doh japang
Bukan turunan rajo angek garang

Nan suko mahariak mabulalang
Ma hantam tanah mamburansang
Nan ba ati indak bakalang
Nan bajantuang ka jantuang pisang

Tapi.....Baliauko cukuik tapandang
Bukan pamimpin ormas talarang
Urang punyo ilimu sagudang
Hala jo haram tau jo matang

Nan mambuek kito ragu jo bimbang
Manuruik carito nan bakambang
Baliauko indak bajalan surang
Banyak  mairiang di balakang

Ibarat kudo ado panunggang
Umpamo nakhodo di kapa gadang
Ndak sio-sio lawik ka nyo hadang
Lah nyo ukua ombak jo galombang

Dek ambo hanyo sakadar bayang
Untuak di ingek jo dikanang
Baa pasannyo niniek moyang
Nan sampai kini tangiang ngiang

Sadangkan bulando jo japang
Baragam sinjato nyo bao parang
Jo talang barancuang ba usia pulang
Baserak - serak pulang kandang

Iko hanyo dari subarang
Alun sampai sabateh pandang
Manga pulo kito ka gamang
Siapkan sajo lado barandang

Sajak dunia takambang
Yang namonyo ula ngiang
Nyo lulua abih loncek gadang
Konon pulo kok garundang

Untuak nan mudo jo bujang bujang
Baiak di kampuang di rantau urang
Cari dunsanak jo induak samang
Kampuang halaman toloang di tenggang

Bapikiran laweh bajiwa lapang
Ba alam leba balapang padang
Jauahkan suduik pandang
Nak jan picik jiwa bakakang

Musuah jan di hadang
Kok basuo jan mahilang
Sakali layie takambang
Bapantang suruik ka balakang

Adat jo sara’ di kundang kundang
Bak cando tubuah jo bayang bayang
Kama sajo ka malayang
Walau ka tingga di awang awang

Kok basuo aral malintang
Batu supadan di anjak urang
Busuangkan dado tagak manggangkang
Jan takuik darah tabuang

Ibarat gumarang jo si binuang
Batamu musuah di tambun tulang
Baiak singo bia baruang
Sakalipun mungkin inyiak balang

Langkah ampek ka di pasang
Cabuik karih di pinggang
Jo suduik mato mamandang
Urah langkah jo hati tanang

Partamu langkah manyilang
Ka duo langkah manyimpang
Katigo langkah ka bulakang
Ka ampek siap manarajang

Disinan tantu ameh jo loyang
Nyato kalah jo manang
Bak cando malam jo siang
Jaleh tatungkuik manilantang

Jan nyo kakok mangupalang
Ibarat mamasak kalio randang
Karambie abih santannyo jalang
Minyak tandeh samba ta buang

Lah hitam kayu jadi arang
Lah hanguih kuali dek tapanggang
Asok di pagu lah manjulang
Nan tanak tak kunjuang matang

Labiah elok baputiah tulang
Baputiah mato tabulalang
Salamaik bana badan pulang
Apo gunonyo harago diri hilang

Nan satuju rancaklah tanang
Kok lamak makanlah surang
Ndak guno pulo solang manyolang
Batangka bakaruak arang

Awak sa parak jo saladang
Samo sabanda sapamatang
Manga ka hancua padi nan kambang
Hanyo dek kabau manyubarang

Labiah rancak sarawa gadang
Tapi panuah saku jo uncang
Dari pado laweh arang
Kecek manusuak di bulakang.